شوفت الموت ورجعت.. ياسمين عبد العزيز تكشف تفاصيل فترة مرضها وطلاقها

قالت الفنانة ياسمين عبد العزيز إنها أصبحت أفضل بعد الأزمات التى تعرضت لها خلال الفترة الأخيرة من حياتها، بفضل أنها أصبحت تحب نفسها وتعطيها اهتمام أكثر من السابق.

وأضافت خلال حلولها ضيفة على برنامج «معكم منى الشاذلي»، مساء الخميس، المذاع عبر شاشة «ON» مع الإعلامية منى الشاذلى: «بقيت أنانية شوية لنفسى، كنت بدى كل اللى حواليا ما عدا أنا، فأنا خلاص كفاية وبقيت أحب ياسمين شوية».

لفتت إلى أنها مرت بمرحلة عدم اتزان فى حياتها، وفى تلك الفترة ظهرت فى أحد البرامج التلفزيونية، التى كان يتطلب وقتها أن تمنح نفسها مزيدا من الوقت حتى تظهر فى مثل هذا اللقاء وتستطيع التحدث، مضيفة: «لأن الواحد وهو جوه الموضوع بيبقى غير براه، مبتبقيش شايفة وأنتى جوه الحاجة بتبقى فى الدوامة».

تابعت: «مينفعش حد ياخد قرارات وهو جوه الحاجة، حتى فى الطلاق مش لازم تدخلى علاقة بعد الطلاق على طول، حتى لو أنتى طالبة الطلاق فهو مش حاجة سهلة، وبيحصل عدم توازن لأى حد بيتطلق، فلازم الواحد يهدى ويرتب دماغه»، متابعة: «أنا فى وقت مكنتش حاسباها صح، واتكلمت فى حاجات كتير مش صح، وغلطت، ولما أقول غلطت مش معناها إنى ضعيفة».

استطردت: «الحاجات اللى مريت بيها فى حياتى أى حد مكانى كان ممكن ينهار.. حروب، أذية، طلاقات، كنت فى المستشفى 4 شهور ونص، شوفت الموت ورجعت.. كل واحد بيشوف مشكلته كبيرة، لكن فى الآخر القوى هو اللى بيكمل».

كما أشارت إلى أنها استمدت قوتها لتخطى أزمات حياتها الأخيرة من الله عز وجل، مؤكدة أن صاحب الفضل الوحيد فى حياتها هو الله سبحانه وتعالى، مردفة: «لما بتقربى من ربنا بيطلعك من أى حاجة، والفترة دى مقعدتش كتير، ربنا بيحبني».

استكملت: «فى سنين من عمرى ضيعتها، بسبب إنى كنت خايفة الناس تشمت فيا، واكتشفت بعد كده أنه طب ما يشمتوا، أقعد أنا فى حياة مش مبسوطة فيها عشان الناس هتشمت؟! ما يشمتوا، فى الآخر أنا اللى مش مبسوطة، محدش قاعد مكاني»، مؤكدة أن تلك النظرة هى من بين الأشياء التى غيرتها فى حياتها مؤخرا، مؤكدة أن أهم شيء لديها فى الوقت الحالى هو أن تصبح سعيدة.

فى سياق آخر قالت: «مش هينفع تكبرى وتنجحى من غير ما يكون ليكى أعداء»، مشيرة إلى أن الزواج فى الوسط الفنى ليس له علاقة بالطلاق، فالانفصال يحدث فى كل حتة سواء بالوسط الفنى أو خارجه، مضيفة: «إحنا عندنا نسية طلاق كبيرة جدا فى الوطن العربي».

وعن أسباب حديث الناس عن طلاق الفنانين، ذكرت: «أى حاجة بتظهر للناس مفيهاش بركة، وأنا لو هتجوز فى يوم من الأيام مش هظهر الكلام ده، أنا عايزة أعيش حياة مستقرة بعيدة عن الأضواء»، موضحة أن معنى كلامها لا يعنى أنها ستتزوج فى السر، لكنها ستحافظ على خصوصية حياتها.