جابتني من شعري.. أقوال مشرفة مدرسة العمرانية المعتدى عليها من ولية أمر وزوجها
كشفت التحقيقات في واقعة التعدي على مشرفة مدرسة العمرانية من قبل ولية أمر تلميذة وزوجها، إثر اعتقادها بأن المشرفة وبخت ابنتها، ما أسفر عن إصابة المشرفة المعتدى عليها بكدمات وجروح في الوجه وباقي أجزاء الجسم، وننشر تفاصيل أقوال المشرفة المجني عليها.
أقوال مشرفة مدرسة العمرانية المعتدى عليها من ولية أمر وزوجها
وأضافت التحقيقات في القضية أنه باستدعاء مشرفة مدرسة العمرانية المعتدى عليها من ولية أمر تلميذة وزوجها، وبسؤالها حول ما طبيعة علاقتها بالطلاب محل إشرافها؟ أجابت: علاقتي بيهم حلوة جدًا لدرجة أن هناك أولياء أمور بيكلموني يقولولي أنت أحن على ابني مني، وفي أطفال مش بترضى تروح المدرسة غير لما أنا اللي أقولهم يلا من كتر حبي فيهم وحبهم فيا.
كما جاءت باقي تفاصيل أقوالها، كالآتي:-
س: أسبق وأن اشتكاك أحد الطلاب أو أولياء الأمور؟
ج: لا خالص
س: ما تفصيلات الواقعة تحديدا؟
ج: اللي حصل إن أنا كنت رايحة أركب الباص بتاع المدرسة، وإحنا معديين فجأة وقف قدامنا باص تاني، وفرمل جامد، وفيه أطفال اتخضت، والبنت اللي اسمها سارة عيطت ونزلت مشرفة الباص التاني زعقتلي أنا مش عارفة ليه، وفيه طلاب وبنات عيطوا ومنهم سارة، وبعد كده حاولت أهدي البنت، ما بقولها مالك قالتلي عشان الباص والزعيق وكده، فطبطبت عليها، وجبتلها آيس كريم وقعدت ألعب معاها لحد ما هديت.
وأكملت: وركبنا الباص بتاعنا وماشيين خلاص، وحاولت أكلم مامتها عشان أبلغها باللي حصل وأن بنتها عيطت واتخضيت لقيت موبايلها مقفول، وبعدها جينا بقى عند بيتها، استنيت لحد ما نزلت هي وزوجها، قامت فاتحة الباب والبنت ساعتها كانت نايمة على حجري سحبتها ولبستها الشنطة، وقالتلي هو إنتي بتزعقى لبنتى ليه، قلتلها أنا مزعقتلهاش ولا حاجة.
وأردفت: وقامت جايباني من شعري وقعتني على الأرض وقعدت فوقي، وقعدت تضرب فيا جامد أوي لحد ما زقيتها عشان تقوم من عليا، ولما قمت لقيت الناس كلها بتبص على وشي، فبقولهم في إيه، قالولي وشك متشرح وجايب دم من كل حتة، وبعدين رحت على القسم عملت محضر، وبعتوني على مستشفى أم المصريين، كشفوا عليا ولقيت وشي ودماغي وضهري متشرح خالص وكدمات في جسمي كله وبس ده اللي حصل.
س: متى وأين حدث ذلك تحديدًا؟
ج: الكلام ده حصل يوم الاثنين 2025/12/8
س: ما سبب تواجدك بالزمان والمكان سالفي الذكر؟
ج: كنت بوصل بنت من البنات لبيتها
يذكر أن أمرت جهات التحقيق المختصة بالجيزة، بإحالة المتهمين بالتعدي على مشرفة مدرسة في العمرانية للمحاكمة.