كله برضايا.. اعترافات مثيرة لضحية هتك العرض على يد خطيبها بالجيزة
أحال المحامي العام الأول لنيابة جنوب الجيزة الكلية المتهم بالتعدي على خطيبته بالوراق إلى الجنايات، حيث استمعت النيابة العامة إلى أقوال المجني عليها، التي أكدت قيامها بالزواج عرفيا من خطيبها بعد ذلك.
مفاجآت مثيرة وردت في نص اعترافات المجني عليها في الواقعة، التي قالت: " اسمى ف.م.ح.، السن ١٧ سنة، المهنة حارسة عقار، اللى حصل إنى أنا شغالة حارسة عقار في عمارة، وم.ر.ع.ح شغال سواق توكتوك وكان بيعدى دائما بالتوكتوك قدام العمارة اللى انا شغالة فيها من زمان وانا كنت معجبة بيه وكنا دائما بنبص لبعض أنا وهو ومن حوالى سنتين ونص أنا كنت بجيب طلبات ولقيته جالى واتكلم معايا شوية فى الشارع وادانى رقم تليفونه ساعتها ومن يومها وأنا وهو بنتكلم مع بعض وحبينا بعض وفى شهر ١٢ السنة اللي فاتت جيه أتقدم هو وأهله لأبويا واتخطبنا.
وأضافت: ساعتها بس أهلي مكانوش موافقين عليه ومكانوش بيحبوه وأنا اللى كنت بضغط عليهم وأقولهم إني أنا بحبه وعايزاه وبعد كدة العلاقة تطورت ما بينا وفى يوم ۲۰۲۲/۵/۱۵، مارسنا علاقة جنسية كاملة ومن حوالى شهر أنا وهو اتخانقنا خناقة عادية فأنا قلعت الذهب اللي هو كان جايبهولى وادتهوله ولما أهلي عرفوا بالخناقة دي قالولى خلاص احنا هنفسخ الخطوبة ومش هتتجوزى الواد ده وكل واحد يروح لحاله بس أنا من ساعتها كنت عمالة أقول لأهلى لا أنا عاوزاه وبحبه وكمان هو كان بييجى لأهلى ويحاول إننا نرجع لبعض بس أهلی موافقوش برده.
وتابعت: "اتفقنا مع بعض إن إحنا نعرف أهلى إننا عملنا علاقة مع بعض عشان أهلي يوافقوا إننا نرجع لبعض ونتجوز وساعتها خطيبي قال لأمه إلى إحنا عملناه مع بعض وراحت أمه قالت لأمى الموضوع دا ولما أمي عرفت قالتلى إحنا كدة لازم نحل الموضوع عشان المصيبة اللي إنتي عملتيها وبعديها أبويا عرف ولما عرف ضربنی وقاللی برده مش هتتجوزي الواد دا.
وواصلت اعترافاتها، قائلة: ساعتها أنا قررت اسيب البيت وفى يوم الأربعاء اللي فات الموافق ۲۰۲۲/۷/۲۷ هربت وروحت بنى سويف وقعدت عند واحدة صاحبتى ولما روحت بنى سويف كلمت خطيبي وقلتله إن أنا هربت وسيبت البيت عشان نتجوز ساعتها جالى بنى سويف وكتبنا عقد جواز وانا مضيت عليه انا وهو وولاد خاله مضوا عليه كمان وبعد ما كتبنا العقد دا بيوم عملنا علاقة مع بعض ثانى انا وهو وساعتها انا قعدت في بيت ابن خاله ده وفضلت من ساعتها قاعدة هناك لحد ما عرفنا امبارح من أخته إن أمى عملت محضر في القسم ساعتها رجعنا القاهرة وروحنا القسم عشان نحل الموضوع ونخلصه".
وأضافت المجني عليها:" أنا عرفت جوزي من حوالى سنتين ونص، واتخطبنا شهر ۱۲ سنة ۲۰۲۱ وعملنا علاقة مع بعض أول مرة يوم ۲۰۲۲/٥/١٥ في بيته، وفسخنا الخطوبة من حوالى شهر واتجوزنا عرفى وكتبنا عقد يوم الأربعاء الموافق ۲۰۲۲/۷/۲۷ في بنى سويف الساعة ١٠:٠٠ مساءً تقريبا، وعملنا علاقة مع بعض تانى مرة يوم الخميس الموافق ۲۰۲۲/۷/۲۸ في بيت في بني سويف اللى قولت عليه، وهو دا جوزی وأنا اعرفه من حوالى سنتين ونص، واحنا عملنا العلاقة دي بدون إكراه ليا أو قوة أو تهديد، وأنا بحبه وساعتها احنا كنا اتجوزنا وكتبنا عقد وانا مراته وانا كنت موافقة على كده.
وتابعت: المرتين اللى عملنا فيهم كده كانوا برضايا وانا كنت موافقة عادى ومحاولتش أقاومه أو أمنعه وأنا بحبه وساعتها كنا مخطوبين وانا كنت مبسوطة ساعتها وكنت عايزة دا عادي عشان احنا كنا المفروض هنتجوز، واستمرت علاقتنا ببعض وانا قعدت عند بيت ابن خاله في بني سويف برده عشان هو اهله ساعتها قالولى هتعيشوا مع بعض بعد ما أهلك يعرفوا وتتجوزوا رسمى وفضلنا كده لحد ما عرفت امبارح ان امی عملت محضر إن انا اتخطفت ولم عرفت بكده ساعتها نزلت انا وهو من بنى سويف وجينا القاهرة وروحنا القسم عشان أقولهم إن إحنا متجوزين وإن أنا متخطفتش ولا حاجة وانا لما مشيت من البيت مشيت بإرادتي ومحدش قاللى أعمل كده".
أقوال سائق التوك توك المتهم بهتك عرض خطيبته في الجيزة
س/ ما تفصيلات إقرارك؟
ج/ اللى حصل إن أنا سواق توكتوك وكنت بعدى وانا شغال على التوكتوك قدام العمارة وكنت بشوفها على طول عند العمارة دي وعجبتنى ساعتها وكنا بنبص لبعض علي طول انا وهي لحد ما في مرة من حوالي سنتين ونص اتكلمت معاها في الشارع واديتها رقم تليفونى ومن ساعتها بقينا نتكلم وحبينا بعض وروحت اتقدمتلها من حوالي سبع شهور واتخطبنا فعلا وكنت بحس ان أهلها مش بيحبونی.
وأضاف المتهم بـ هتك عرض خطيبته في الجيزة، كنت بحس أن أهلها مش عايزين الجوازة دى تتم، وفي يوم في رمضان اللي فات جاتلي البيت وساعتها اقمنا علاقة مع بعض وبعديها بكام يوم في رمضان برده أقمنا علاقة مع بعض تاني في بيتي برده، وبعد كدة من حوالي عشرين يوم اتخانقت انا وهي خناقة عادية وساعتها لما أهلها عرفوا فركشوا الخطوبة وقالولنا مش هتكملوا بعض تانى خلاص ورجعولي دهبي وانا ساعتها حاولت كذا مرة اروح لأهلها وأحاول أصالحهم وأرجع الموضوع عشان نتجوز بس أهلها كانوا بيرفضوا علي طول.
وتابع: ساعتها قولت لأهلها إنى إحنا عملنا علاقة مع بعض عشان يخلونا نرجع لبعض بس أهلها برده مرجعوناش ساعتها، وبعد كدة لقيتها بتكلمنى على الموبايل وبتقولى انا سيبت البيت وروحت بني سويف وقاعدة عند واحدة صاحبتي هناك عشان أهلي مش عايزين يرجعوني ليك وقالولى هنعملك عملية عشان نخليكي بنت وهنجوزك لأى حد بس مش هتتجوزی سواق التوك توك ساعتها انا سافرتلها بنى سويف وقعدت أدور على محامى مش فاكر اسمه ايه.
وتابع المتهم ساعتها المحامي ده خلانا نعمل عقد جواز وخلاني اكتب قائمة ليها واتجوزتها عرفى، وبعديها بيوم لقيت اختى بتكلمني وبتقولى ام خطيبتي عملت محضر ضدك والحكومة بتدور عليك ساعتها انا خدتها ونزلنا القاهرة وروحنا على قسم بولاق الدكرور في الجيزة.
س/ ما هي علاقتك بالمجنى عليها تحديدا؟
ج/ دلوقتى مراتى بعقد عرفي وانا اعرفها من حوالي سنتين ونص واحنا بنحب بعض.
جاء بأمر الإحالة الذي أعدته نيابة جنوب الجيزة، أن المتهم هتك عرض طفلة بغير قوة أو تهديد بأن إختلى بها على إثر خطبتهما مستغلا حداثة عهدها وعاشرها معاشرة الأزواج.
