مراتي طلعت راجل.. شاب يتهم زوجته في البحيرة والأخيرة ترد فما القصة؟
أثارت اتهامات زوج شاب لزوجته بحملها صفات ذكورية وجهاز تناسلي ذكري، وتعرضه لعملية خداع منها ومن أهلها حالة من الجدل عبر مواقع التواصل الاجتماعي، وهو ما قابلته الزوجة باتهامات متبادلة وجهتها لزوجها، ودافعت خلالها عن نفسها.
يقول الشاب في اتهاماته لزوجته: "خطبت مراتي، زي أي شاب ما بيتقدم لواحدة واستمرت الخطوبة سنتين، وكانت الأمور ماشية زي أي اتنين مخطوبين، ملاحظتش حاجة غير طبيعية سواء منها أو من أهلها ومحدش قاللي أي حاجة تتعلق بمشكلات صحية بتعاني منها أو خلافه".
ويضيف: "في ليلة الدخلة خلصنا الفرح ورجعنا على بيتنا، وهنا كانت صدمة عمري لما اكتشفت إن مراتي عندها عضو ذكري، مكنتش عارف أعمل إيه ساعتها، اتصلت على أهلها وجبتهم، وحكيتلهم، لقيتهم بيتعاملوا مع الموضوع إنه عادي وقالولي متكبرش الأمور، هي محتاجة عملية توسيع بس وكل حاجة هتبقى طبيعية".
ويكمل: "جريت بيها على أكتر من دكتور، كلهم أكدولي إنها بتحمل صفات الذكر والأنثى، أنا اتعرضت لعملية خداع كبيرة من مراتي وأهلها، ولما طلبت منهم ننفصل عاوزين يدفعوني تمن القايمة اللي مضوني عليها".
الزوجة "هبة" كذبت مزاعم واتهامات زوجها قائلة: "ليلة الدخلة لقيت جوزي بيقولي، قبل أي حاجة: إنتي كنتي ولد وعملتي عملية تحويل وأنتي صغيرة، والحكاية غير اللي بيقولها خالص، أنا اتولدت بعيب خلقي خارجي في الأعضاء التناسلية، بسبب وجود قرابة بين والدي ووالدتي، كان يتطلب إصلاح، وخضعت فعلا لعملية جراحية وأنا عندي 9 شهور، لكنها كانت عملية إصلاح فقط مش عملية تحويل جنس زي ما بيتهمني، وقبلها عملت تحاليل سافرت أمريكا، وأثبتت إني أنثى كاملة الأنوثة".
وأضافت هبة: "ليلة الدخلة بعد جوزي ما صدمني بكلامه انهرت وقلتله رجعني لأهلي لكنه رفض، وفضلت في بيت جوزي 7 شهور، وحصل حمل خلالها وأجهضني بضربه ليا، هو لو أنا راجل هحمل إزاي؟!."
وأكدت الزوجة: "كل حملة التشهير دي غرضها ابتزازي أنا وأهلي، اتضحلي إنه كان داخل على طمع وعاوز أهلي يصرفوا عليه، وأمه قالتلي ادفعيله 70 ألف تمن العفش وهيسيبك قاعدة معاه".
واختتمت حديثها قائلة: "أنا اتعرضت لإهانة وضرر نفسي كبير من جوزي، والطب الشرعي موجود يفصل ما بيني وبينه ويحدد مين الصادق ومين اللي بيكدب".
