حسبولي رقم وهمي وقالولي إنت اغتصبت بنت.. اعترافات مثيرة لـ مداهم في تحقيقات النيابة
كشفت تحقيقات النيابة، تفاصيل جديدة حول واقعة ضبط البلوجر مداهم، داخل منزله بمنطقة شيراتون، وتوجيه عدة اتهامات له في قضية “المخدرات”.
تفاصيل مثيرة وردت في التحقيقات مع البلوجر مداهم، حيث أكد في أقواله: “اللي حصل إن أنا كنت في بيتي في شيراتون، وصحيت من النوم يوم السبت الموافق 2025/8/2، وجرس الباب كان بيرن، فتحت لقيت مرات البواب بتقول لي إن في ناس غريبة كانوا بيسألوا عليك، وبعد كده لقيت ناس دخلت وزقت باب الشقة، فقولتلهم بالراحة، قالولي اسكت، فسألتهم إنتوا مين؟ قالولي إحنا مباحث المديرية، سألتهم في إذن نيابة؟ قالولي هتعرف كل حاجة في القسم، ودخلوا الشقة بتاعتي، فتشوها وجابوا عليها واطيها، وخدوا كل الساعات بتاعتي”.
وتابع: “بعد كده دخلوا على الخزنة، قالولي افتحها، قولتلهم الخزنة فيها فلوس، لقيت واحد ظابط بيقوللي حاجتك في الحفظ والصون، وفتحت باب الخزنة، طلعوا منها 100 ألف جنيه مصري، و31224 دولار أمريكي، وتقريبًا 7 انسيالات خيط مطعم فيهم دهب، وسلسلتين دهب واحدة مكتوب عليها 777 وواحدة مكتوب عليها DODA، وسلسلة دهب عليها فراشات، وميدالية فضة، وجنيه دهب، وسبيكة دهب 5 جرام مكتوب على الجراب بتاعها مكة”.
وأضاف: “وبعد كده فضلوا يجيبوا مقتنياتي الشخصية، ولقوا 4 أو 5 سجاير ملفوفين فيهم مخدر، وحتة أفيون صغيرة جدًا، وخدوا 5 تليفونات: آيفون 16 برو ماكس، وآيفون 15 برو ماكس، وآيفون 14 برو ماكس، وسامسونج، وإنفينكس بايظ وخدوه برضه”.
واستكمل: “وبعد كده جه معاون مباحث من قسم النزهة، واتنين من ظباط تكنولوجيا المعلومات، وفضلوا يدوروا في الشقة، لقوا شنطة السفر بتاعتي وفتشوها، لقوا فيها 10 آلاف جنيه مصري، وخدوا الفلوس والشنطة، وخدوا الـDVR بتاع الكاميرات، وخدوا عربيتي، وصوروني في البيت مع الحاجات اللي أخدوها، وبعد كده أخدوني قسم النزهة، وقعدت في أوضة أمناء الشرطة، والظباط في المكتب اللي في وشي، وفضلوا يرصوا الحاجات اللي جابوها من شقتي، وصوروني تاني في القسم مع الحاجات”.
وأضاف: “قعدت في الأوضة مع أمناء الشرطة وهم بيدوروا في موبايلاتي، وأنا إديتهم الباسوردات، وكان في ناس بتتصل عليّ وخلوني أقولهم إني في البيت ومفيش حاجة، وبعد كده جابولي اتنين موظفين من الضرائب حسبوا العملات اللي بتيجي من التيك توك، وحسبوا رقم كبير جدًا وأنا شايفه وهمي، ورفضت أمضي عليه، وبعد كده غيروا الإقرار لـ85 ألف دولار أمريكي و25 ألف دولار أمريكي، وقالولي لو مش هتمضي مش هنغير المحضر، فساعتها مضيت”.
وتابع: “فتحوا الانستاباي بتاعي وشافوا الحساب عليه، وبعدين نزلوني الحجز حوالي الساعة 2 بليل، وخرجت الصبح على النيابة، ومعرفتش أتواصل مع أهلي أو أي حد، وكان في محامي جالي ورفضوا يوصلوه بيا”.
وبسؤاله عن الأحراز التي تم عرضها عليه، قال: “الخمس سجاير اللي فيهم مواد مخدرة دول اللي بتوعي، والحتت البني دي متمسكتش معايا، أنا كان معايا حتت مخدر وحتة أفيون صغيرة، بس مش من ضمن الحاجات اللي في الحرز”.
وأكمل: “محدش اتكلم معايا، وعاملوني معاملة مش كويسة، وكل ما أسأل حد فيهم في إيه يقولولي اسكت دلوقتي أو هتيجي معانا القسم وهنفهمك هناك، ولما سألت ظابط مباحث المديرية تهمتي إيه قاللي إنت اغتصبت واحدة وعاملة فيك محضر، وظابط تكنولوجيا المعلومات كان بيفضل يسألني مين اللي إنت بتعمل معاهم علاقات على التيك توك”.
