حارمين ابني من الرضاعة.. سيدة تستغيث من تعدي زوجها وأسرته عليها بالضرب وأخذ صغيرها

تفحص الأجهزة الأمنية استغاثة سيدة عبر صفحتها على موقع فيسبوك تتضمن تضررها من زوجها وأسرته بدعوى تعديهم عليها وحرمانها من نجلها على الرغم من حصولها على حكم بحضانة الرضيع، كما حوى المنشور مقطع فيديو لمشادة بينهم.

وكشف هاجر في مقطع فيديو على صفحتها الشخصية عبر فيسبوك تفاصيل استغاثتها من زوجها، زاعمة: أرجوكم ساعدوني أرجع ابني، جوزي بيسافر يشتغل في الإمارات ونزل إجازة، واكتشفت على تليفونه فديويهات مخلة وإنه بيشتغل شغل مش كويس وبينصب على الناس في فلوسهم ومتخفي تحت مسمى إنه مهندس كدب وهو أصلا دبلوم وكل ده معايا أدلة عليه، وكل اللي طلبته إني أتطلق ويوديني عند أهلي أنا وابني طفل رضيع عمره 3 شهور.

وادعت في الفيديو: زوجي قعد يضرب فيا ضرب مبرح ويهددني إنه ياخد ابني  مني ونزلني من شعري جرجرة على السلم لحد أهله تحت وكلهم ضربوني كل واحد بقى يمد ايده عليا شوية وتهديدات بقى لحد أخته بقت قاعدة فوقي تقطع شعري وحبسوني في بيتهم أربع أيام ضرب وصويت كل يوم، والجيران اللي في وشي نادوا عليا قالولي هاتي رقم أهلك وقولي فيكي إيه بعتلهم ورقة وقولتلهم وكلموا أهلي ماما وأختي جوا الفجر بالنجدة ياخدوني.

وادعت: أخوه خد ابني من إيدي غصب وحرقوا قلبي عليه وأخوه بقى يهددني إني مش هقدر أعمل حاجة، وبقالي أكتر من تلت شهور بلف من محافظة لمحافظة ومش عارفة آخد ابني، الكلام ده من يوم 19/9/2025 وأنا من إسكندرية وهما من محافظه تانية.

وزعمت: روحت المنصورة خدت قرار بتسليمي ابني وطلعلي القرار في يومها ولكن بروح أنفذ بيخبوا ابني ويقولوا مش موجود ويعملولي محاضر كيدية إني شتمت أخوه.. لا أخدت من شقتي دهب ولا حاجة.

وادعت: حقيقي تعبت ومفيش حد يساعدني أنا بعمل كل حاجة عشان أرجع ابني مش قادرة عليهم والله العظيم وقبل ما أتجه للمحكمة، حاولت بطرق ودية أكتر من مرة وبدون فايدة وكلمت شيوخ بلدهم كلهم يردوا يقولوا ده راجل مش هنسبهولها لو بنت كنا رمنهالها.

وواصل في مزاعمها: يا يوافقوا يدهولي بس أتنازل عن كل حاجة أقول ماشي يحددوا معاد يجوا ويضحكوا علينا والناس تشهد بكده، وقاعدين بس يعملوا محاضر كيدية كل شوية وأنا أصلا مش من بلدهم ولا بكون هناك ويتعمل محضر إنب شتمت عشان يخوفوني، وأخوه كل ما أروح يهددني إني لو روحت هناك تاني هيرمي على وشي مايه نار.

وزعمت: مش عايزة حق اللي حصل فيا ولا عايزة حاجتي أنا مرفعتش قضية بالقايمة لحد دلوقتي ولا فارقلي ومش عايزة حاجة غير ابني بقاله 3 شهور بعيد عن حضن مامته وبيبعتلي يقهر قلبي إن ابني عنده مياه على الكلى وأنا كنت كاشفة على ابني كشف شامل مكنش عنده مياه على الكلى ابني هيموت، لأنهم حارمينه حتى من الرضاعة.