خطفوني وأنا مروحة وحاولوا يعتدوا عليا.. أقوال مثيرة للفتاة في واقعة اختطافها بالشيخ زايد
كشفت التحقيقات تفاصيل أقوال الفتاة المجني عليها في الواقعة التي تم تداول مقطع فيديو بشأنها والتي تضمنت اختطاف آخرين لها عنوةً داخل سيارة بمنطقة الشيخ زايد.
وأضافت التحقيقات في القضية أنه بمثول الفتاة المجني عليها في الواقعة، وبسؤالها حول ما هي تفاصيل أقوالها لشأن الواقعة؟ أجابت: اللي حصل إن أنا ساكنة في الطوابق فيصل ويوم الاثنين 24/8/2026 كنت جاية الشيخ زايد عشان أسهر مع أصحابي في أركان، وبعد لما تخلص القعدة في أركان نروح نسهر في الكيت كات بس السهرة اتلغت فأنا قلت هروح على البيت بتاعي وركبت عربية لحد لما نزلت عند مول سيراميكا كيلبوباتر تقريبا وكانت الساعة 2 الصبح تقريبا يوم 25/8/2026.
وأكملت: وأنا واقفة عشان أطلب أوبر لقيت فيه شاب نازل من عربية وجاي عليا فأنا مكنتش مدية خوانة وكنت ماسكة التليفون عشان أطلب أوبر لقيته جه وشد التليفون مني فأنا مسكت فيه ومكنتش عايزة أسيب التليفون بس هو قدر ياخده مني بالعافية ولقيت العربية جت قربت مني وفيه واحد تاني نزل من العربية وشالوني ورموني في العربية وببص لقيت نفسي في الكتبه اللي ورا وكان أربع شباب قاعدين فيها واتنين جنب السواق والسواق نفسه وقفلوا العربية واتحركوا بيا وأول لما اتحركوا راح واحد فيهم اللي هو شد مني التليفون راح شدني وأنا في الكتبه وبعد كدا اعتدوا عليا.
وأردفت: وكانوا بيضربوني في وشي وأنا بقاوم وفي الوقت دا جه سواق عربية نقل كان معدي فأنا صوّت وقعدت أقوله دول عايزين يغتصبوني فالسواق قالهم حرام عليكم سيبوها وهو في العربية راح واحد منهم رفع عليه المطواة وقاله لو مامشيتش من وشي هشرحك في راح السواق قاله اولعوا بجاز ومشي، فلقيت الشخص اللي خد مني التليفون بيقولي إنتي عمالة تصوتي أنا هخليك تصوتي بجد وراح زقني في العربية تاني في الكنبة اللي ورا واعتدوا عليا، واحد قال للتاني نزلها هتحبسنا ووقف بالعربية فراحوا رموني من العربية وأنا فضلت ماشية في الطريق وأشاور للعربيات محدش راضي يقف لحد لما لقيت عربية سوزوكي معدية وقف معايا وخدني على القسم.
