سايبني وبيكلم العرايس طول الليل.. سيدة تطلب الخلع في محكمة الأسرة بعد 6 شهور زواج

تقدمت شابة بدعوى خلع ضد زوجها أمام محكمة الاسرة، بعد 6 شهور من الزواج، قائلة: «اكتشفت أنه يعاني من (هوس العرايس) يتحدث يوميًا مع دُمى وعرايس بحجم الإنسان، يعتبرهم أصدقاءه المقربين، ويعاملهم كأشخاص حقيقيين داخل المنزل».

تروي ندى، 28 سنة، تفاصيل دعواها أمام محكمة الاسرة: «كنت عارفة إن عنده شوية ميول فنية، بيحب يجمع تماثيل، لكن اللي شفته بعد الجواز مش طبيعي، اكتشفت إن عنده أكتر من 10 دُمى كبيرة، ومخصص لكل واحدة اسم وشخصية، وبيقعد يتكلم معاهم كل يوم بالليل، في البداية اعتقدت أن الأمر نوع من الفانتازيا، لكن ده بقى يتدخل في حياتنا اليومية».

وتابعت: «كان بيزعقلي علشان فتحت شباك الأوضة والعروسة ممكن تبرد، وكان بيقولي: دي زعلانة منك علشان طنشتيها امبارح، حاولت اتكلم مع أهله، لكنهم أكدولي أن عنده خيال واسع من زمان».

وأضافت: «كان بيرفض الخروج معي أو زيارة أهلنا وأصحابنا ويقضي معظم يومه مع العرايس»، متابعة: «مرة صحيت من النوم لقيته بيعمل احتفال صغير في الصالون لعروسة جديدة جابها من على الإنترنت، ومعلق لها زينة وبالونات، وبيقول: دي خطيبتي».

وبعد 6 شهور من محاولات الإصلاح، قررت ندى رفع دعوى خلع، مؤكدة: «أنا مش عايشة مع بني آدم، أنا عايشة في بيت فيه متحف مجانين».