بيرقص قدام المراية.. سيدة تطلب خُلع زوجها في محكمة الأسرة

تقدمت سيدة في أواخر العشرينات بدعوى خلع ضد زوجها بعد سنة من الزواج بسبب حبه الكبير لنفسه وقضائه وقت مبالغ به أمام المرآه إضافة إلى أفعاله الغريبة حيث ذكرت: «مش قادره أعيش مع واحد بيحب نفسه أكتر من أي حد، وبيقضي نص يومه بيرقص قدام المراية».

قالت الزوجة في تفاصيل الدعوى: «تقدم لخطبتي تقليديًا وتم الزواج بعد 3 أشهر، لاحظت تصرفاته من أول أسبوع، كان بيقف قدام المراية بالساعات، بيعدل في شعره، ويجرب لبسه، وبيصور نفسه، كنت فاكرة ده مجرد اهتمام زائد بنفسه، بس اكتشفت إن الموضوع أعمق من كده بكتير».

تابعت: «كل يوم الصبح كان بيقف قدام المراية في أوضة النوم، يشغل مزيكا بصوت عالي ويفضل يرقص ويعمل حركات كأنه بيصور فيديو كليب، وساعات بيكلم نفسه، ووصل بيه الحال إنه فكر جديا يشتغل موديل وفعلا بدأ يوصي أصدقائه يشوفوله فرصة».
وأكدت: «بقيت حاسة إن في راجل تاني عايش معايا شايف نفسه بس، وآخر اولوياته مسؤولية البيت واحتياجاتي أنا كـ ست، حاولت اتكلم معاه وأفهمه إن في أولويات لازم يفكر فيها غير نفسه ولبسه و«الإسكين كير» بتاعه، لكنه رد وقالي: أنا بحفز نفسي وأعزز ثقتي بنفسي، ولما طلبت منه يخف شوية قال لي: لو مش عاجبك، تقدري تمشي، شعرت بالإهانة والإهمال، ومع الوقت ما بقيتش أحس بوجوده كزوج، وأنا محتاجة يكون عندي بيت وأسرة وزوج راعي ومسؤول».

بينما جاء رد الزوج: «أنا دلوقتي في مرحلة تطوير ذاتي، مشغول بنفسي أنا شخص إيجابي بحب الحياة، واللي بيحبطني مش لازم يكمل معايا، دي بتغير مني عشان شكلي ووسامتي، وكل اللي يهمها الناس تقول علينا إيه».