معاه إعدادية والمسدس لعبة.. أشقاء القاضي المزيف يكشفون مفاجآت صادمة

أثارت قضية القاضي المزيف، ضجة كبيرة خلال الفترة الماضية، بعدما قام شخص يدعى “مصطفى” بانتحال صفة قاضي والتقط مجموعة من الصور والفيديوهات له داخل محكمة بالقاهرة، ونشرها عبر صفحته بمواقع التواصل الاجتماعي للنصب على المواطنين.

وكشف شقيقة القاضي المزيف، طبيعة شخصية المتهم وطريقة تعامله مع أسرته، قائلة: “هو كان بيتنرفز علينا على طول، وماكنش بيجيله طول بال يقعد في البيت أصلًا، كان دايمًا بره على طول، وكان قليل لما بيجي يزورنا، وهو ساكن في إيجار حتى الآن”.

وأضافت شقيقة القاضي المزيف: “أخويا كان طالب في الإعدادية وساب المدرسة، ووفاة والدته أثرت عليه نفسيًا جامد لدرجة إنه ساب البيت ومشي”.

كما ظهر شقيق القاضي المزيف في مقطع الفيديو، وقال: “الناس بتتكلم عليه، وإحنا مش عايزين نتكلم مع حد، أنا بس حابب أوضح أن مفيش ولا 8 ملايين جنيه ولا الكلام ده”، وذلك ردا على المزاعم حول دفع المتهم مبالغ كبيرة مقابل التصوير داخل المحكمة.

وقال المحامي أحمد حمد دفاع القاضي المزيف: "الواقعة دي حصلت في قرية، وأهل القرية كلهم عارفين بعض، وكلهم عارفين إن مصطفى معاه إعدادية، وعارفين إن مصطفى نفسيته تعبت بعد وفاة والدته، وساب البيت وساب البلد وعاش لوحده".

وأضاف حمد: "المسدس اللي كان معاه ده لعبة، ممكن يكون ولاعة بلاستيك، وأهله قالوا إن كان حلم أمه إنه يكون قاضي، فعلشان كده بدأ ينتحل صفة قاضي والأمر أثر عليه نفسيًا يعني، لكن أهله محدش يعرف إنه فعلًا كان منتحل صفة قاضي ومستشار زي ما بيقولوا، هما اتفاجئوا زي أي حد من الإعلام والسوشيال ميديا".