لمس جسمي ولما زعقت ضربني لحد ما نزفت.. فتاة تُبلغ عن واقعة تحرش داخل ميكروباص
تداول عدد من رواد موقع التواصل الاجتماعي «فيس بوك»، منشورًا يوضح تعرض إحدى الفتيات للتحرش، داخل سيارة ميكروباص في القاهرة، وكتبت الفتاة عبر صفحتها منشورًا توضح تفاصيل الواقعة التي تعرضت لها.
تقول «منى. ص» خلال منشور لها: «مش عارفة أكتب أقول إيه بس أنا منهارة من العياط، أنا النهارده اتعرضت للتحرش من الشخص ده، أنا كنت قاعدة على الكرسي القلاب في العربية وحسيت بإيد وضعت عليا من الخلف، قعدت أبعد وأقول أكيد في حاجة غلط، وبعدين عملت نفسي بعدل الجاكيت من ورا لقيته حاطت إيده عليا ولما اتأكدت ضربته بالقلم، وهو شدني من شعري وضربني ف بوقي لغاية ما كنت عمالة أنزف دم، الناس قعدت تهديني وأنا طبعًا كنت في حالة هيستريا من الصويت والعياط الناس طلعوني أقعد ع الكرسي اللي ورا».
ضرب وتحرش
وتضيف الفتاة: «السائق وأحد الأشخاص بيقولي خلاص بقى يا بنتي عديها حصل خير عايزين نمشي؟ قلت له بصريخ ده اللي هامك ما أنا لو بنتك ماكنتش عملت كده ولما شاف أني بصوره كان عايز يضربني زي ما انتو شايفين كده وكان جنبي بنت قعدت تحضني وتعيط عليا وخدتني وركبتني قدام جنب السواق والناس نزلوا ع الطريق وكان بيحاول يفتح الباب اللي قدام عشان ياخد مني الموبايل، السواق قفل المسوجر وقعدوا يزقوا فيا أنا دلوقتي عايزة حقي، فيه ناس قالت لي دي شوية صور مش هتعرف تعملي بيها حاجة ولا تعرفي تجيبيه فهل ده حقيقي؟».
