هذا سبب ابتعادها عن الفن..ميرنا وليد تكشف حقيقة زواجها من ملياردير | فيديو

كشفت الفنانة ميرنا وليد حقيقة الشائعات المنتشرة حول ابتعادها عن الوسط الفني بسبب زواجها من ملياردير.

وقالت ميرنا وليد في برنامج «كلام الناس»، خلال استضافتها مع الإعلامية ياسمين عز عبر قناة «MBC مصر»: «أنا يمكن اتجوزت واحد ملياردير بمشاعره، وده حقيقي، لكن مش فلوس، وفي الآخر أنا زوجي موظف في شركة طيران، ومعندوش شغل خاص ولا رجل أعمال وهو إنسان طبيعي جدًا».

وأضافت: «معنديش شغل تاني نهائي، وبكون محتاجة مصاريف كتير في حياتي، لكن عندي الشجاعة، ودي إرادة من ربنا إن لو عمل لم أعجب به لا أتعاقد عليه، لأن الفلوس في الآخر بتتصرف، لكن أنا بحب العمل لا المال، وحدث معي موقف من قبل عند تعاقدي على عمل تجاري، ومقدرتش أنام وكنت عايزة أتصل بالمنتج الفجر بس خُفت، ومنمتش وانتظرت للصبح واتصلت به واعتذرت عن العمل».

وتابعت: «هزعل من نفسي لو نزلت الأستوديو غصب عني، ومرة كنت محتاجة فلوس جدا، وأخذت عربون وروحت ومعرفتش أنام، وبقيت منتظرة النهار يطلع عشان أكلم المنتج وأرجع العربون، وكنت هكلمه واصحيه الفجر عشان ارجعه».

واشارت إلى أن «المنتج مكنش راضى أرجع العربون وألغى العقد، لكن قولتله انت جديد في الإنتاج ونصيحة أخت مش هشتغلك غصب عنى«، متابعة:» في ناس قلبوا عليا عشان اعتذرتلهم عن عمل».

وكشفت الفنانة ميرنا وليد، سبب ابتعادها عن الظهور الفني خلال الـ11 عامًا الماضيين، موضحة أنها لم تشارك في أعمال فنية خلال فترة حملها قبل هذه الفترة.

وقالت الفنانة  إن «بعد زواج بشهر واحد كنت حامل في بنتي، وكنت بعمل مسلسل متخافوش مع الاستاذ الراحل نور الشريف، وكنت أجسد دور السكرتيرة الخاصة به، وبعد ذلك قاموا بإلغاء نصف الدور، قولتهم يا جماعة أنا حامل وفي مشاهد ليا لازم أصورها قبل ما يبان اني حامل».

وأضافت:«ولكن لظروف ما ديكور مشاهدي اتاخرت، وبعد تجهيزه بفترة كنت مفروض بجسد دور مخطوبة، وكانت بطني كبيرة وأستاذ نور الشريف كان يدخل أول ما أقوم أقف يقول أقعدي ولا تقفي، وكان مفروض في فترة بسافر وبعمل شغل استخبارات وبجيب معلومات من بره ولكن كل ده اتشال بسبب حملي»

واختتمت: «وبعد حملي في مريم، حملت تاني، وقولت مش هعمل كده تاني اني احمل بالسرعة دي عشان شغلي، ولكن في فترة حملي في بنتي الثانية مايا الثورة قامت وكل حاجة وقفت».

وقالت الفنانة ميرنا وليد إنها كانت تبكى في بداية زواجها عند دخولها المطبخ، مضيفة: «كنت بعيط مش عارفة أعمل ايه».

وأضافت: «ماليش في المطبخ ومبحبهوش.. لما بدخل المطبخ بتضايق.. ولما أتزوجت كنت بدخل المطبخ أعيط».

وتابعت: «أنا ذواقة رقم واحد وعندى موهبة تذوق الأكل لكن ربنا لم يعطينى موهبة الطبخ.. أنا ضايعة في الطبخ»«، معلقة:»أنا مش فرحانة بنفسى انى مش عارفة أطبخ لكن معنديش الموهبة دى وربنا يصبر جوزى عليا«، مشيرة إلى أنها»مرة سلقت فرخة في 12 ساعة ومتسلقتش وباظت.. بتخنق ومبحبش المطبخ ومعنديش خلق».

وكشفت الفنانة ميرنا وليد عن رأيها في عمليات التجميل للفنانات، مشيرة إلى أنها لا تخوض تلك الفكرة وذلك لخوفها من العمليات، موضحة أنها أجرت عملية «بوتكس» مرة واحدة في وجهها.

وأضافت: «أنا جبانة بس مش ضد عمليات التجميل، ومرة واحدة رُحت عملت بوتكس عشان خط صغير في مناخيري وضايقني جدًا إني عملت كدة، بس أنا جبانة وبخاف من الإبرة وبخاف على وشي».

وأضافت: «بخاف حاجة تبوظ في وشي، كنت بقول الدكتور أعمل أي تمارين لو هعمل حاجة بس عملية لا، وأنا ممثلة مينفعش وشي يكون في حاجة بسبب إني لازم أعبر بتعابير كتير بوشي، ولو مذيعه أو مغنية ممكن أعمل كدة، لكن الممثل مينفعش».

وعن رأيها في عمليات التجميل للجسم «نحت الجسم»: «شُفت حوادث كتير وفي ناس بتنجح معاهم وأنا بخاف جدًا أخاف من الناس اللي حصل فيهم حاجة، ولازم منعرضش نفسنا لخطر».